عزاء لمارسيل: بتعرف تدفش؟

النص التالي بكلمات مارسيل نفسها ومنشور على مدونتها.
حبينا نعزيها بمقتل والدتها، السيدة مارينا شحرور، المفجع في حلب يوم أمس، فما لقينا أنسب من الدفشة وطريقة مارسيل بوصفها:

بتعرف تدفش؟

ونحنا طالعين بهالطلعة ، هاد اللي كسر رجلو والتاني ما عاد فيو حيل وعالطريق لفوق وقع معنا ناس واضطرينا نحمل ناس تانيين ع كتافنا ونمشي فين .. وطالعين بهالطريق ..
وأخي بنشرت معنا هالعربية ! فينك تبكي أنو السيارة بنشرت ! إي فينك تبكي طول اليوم
فينك تقعد عالأرض وتزحل حالك زحول لتحت ” انا بضمنلك الوضع تحت خرا .. بس فينك تجرب يعني ”
فينك تحاول تقلنا أنو انت من أول عارف انو السيارة بتبنشر ، وأنو في حجارة عالطريق وفينك حتى تاخد معك مجموعة مننا ع جنب وتبدا تأقنعن أنو السفر بالطيارة احسن من السفر بالسيارة ..
فينك تقلنا أنو ما رح نصل لفوق بعمرنا ، وتندب حظك وحظنا !
فينك حتى تدوّر ع تغطية وتكتب ستاتوس عالفايس بوك قدي نحنا ما منفهم بميكانيك السيارات ، وبالطرقات الصاعدة والهابطة وانعكاساتها عالحياة الإقليمية ..
فينك تعمل كتير شغلات ابتداء من الشتم والندب والتنظير وحتى الرجعة لورا ..
بس بيبقى السؤال خيي بتعرف تدفش ؟
نحنا كلنا ها بحاجة ندفش بهالسيارة ، بحاجة نجيب هالشوية مازوت اللي باقيين عندي وعندك مخبينن من أيام اللي كنا مرتاحين ونحطن بهالسيارة بلكي بتمشيلها مترين كمان
بفهم انك مشوب والحالة مش كتير ع مزاجك ، وبفهم حتى أنو القمة اللي قالولك بعد خطوتين طلعت ابعد
بس بيبقى السؤال خيي بتعرف تدفش ؟
وبفهم كمان أنك مليت مني ومن حكياتي ومنو من غلطاتو ، وهداك صاحبنا اللي طالع معنا انت بتكره كل شي بيقولو
بس شو نعمل يعني؟ منتركو وهو ابن البلد بنص الطلعة معقولة بترضاها انت ؟

خيو بتسمحلي هيك بهالمناسبة السعيدة ونحنا بنص الطلعة أقلك شغلة ..
خيو ما بعرف يمكن المشوار ما نقدر نكفيه سوا ، واحدنا يتعب واحدنا يوقع عالطريق ويصرلو شي

بس بدي قلك انو انا وعالطريق معك ومع الشباب بالطلعة ما عدت أنا نفسي القديم، وانو الطريق اللي مشيناه كتير مهم بالنسبة ألي ..
غيرتني انت ” بهبلك ” وهداك بجنانو .. والتالت بإيمانو .. وهيك قيسها
وبدي اعترفلك بشغلة خيو أنا تعبانة متلك ، ونقاقة متلك .. بس يمكن باقي عندي شوية طاقة ادفش اللي تعبان اكتر مني
بتعرف تدفش ؟
عطيني دفشة لفوق لفوق ..

هذا المنشور نشر في Syria | سورية. حفظ الرابط الثابت.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s