حكي نسوان عسكري

اثنتان تتحدثان بحرية على الهاتف على ايقاع رشقات متقطعة في ليل بيروت الصافي:

– دخلك شو دور الجيش اذا بتقتحم قوات النظام السوري لبنان مرات ومرات وبتمشط بلدات وبيوتها وبتقتل لبنانيين وسوريين وصحافيين والجيش ما بيعمل شي، بس ناشط بموضوع اعتقال الناشطين؟

– ما بعرف. انا كنت عم بتساءل شو دوره اذا بتصير اشتباكات وميليشيات بتحتل مدن، وحروب طائفية أهلية، وما بيعمل شي؟

– يمكن دوره اطفائية

– يمكن دوره مؤسسة توظيف لفقراء عكار ولبنان

– بس هو هالمرة جزء من المشكلة، بطل حتى يقدر يلعب دور اطفائية ولا مؤسسة توظيف لأهالي الشمال وعكّار المعصبين

– انا لقيتها. دوره انه يأهل قيادات الجيش ليصيروا رؤساء جمهورية

– ضالل يعلموا الجنود نشيد البعث: يا شباب العُربِ هيّا و انطلق يا موكبي… نحن جندي مقاتل نحن صوت الكادحين… وارفع الصوت قويا عاش بعث العربِ

– ما بعرف. بدها سيجارة. لك حتى سيجارة مش تارك لنا مجال ندخنها هالأيام. بهالموضوع ناشط كتير. يعني لازم نتساءل عن دوره ونحنا على أعصابنا من دون حتى امكانية سيجارة. شو هالقصة؟!

– لك بدي افهم بس ع شو شايف حاله، والكل هيك مقدسه: “يعطيك العافية يا وطن”، و”تسلم يا وطن”، و”يا وطن!”، وهو فاتح معتقلات ع حسابه، وخصوصا بالمناطق يا اللي هي خزان جنوده، وخدي تعذيب وبهدلة وياللي بضل سنين بالحبس مرمي بلا ما حد يحاكمه، حتى الصليب الاحمر ما بيقدر يدخل معتقلاته..

– وفي ضابط كبير منه عامل فوق هيك إمارة خاصة بالشمال. ياللي عم تراقب خطنا ع التلفون هيدا حكي سياسي، مش حكيي..

– لك ما هو اللي براقب الخط تابع لشي سياسي، لشي دكانة سياسي.. هيدا الجيش مراية، ايه لقيتها، مراية مموهة للسياسيين..

– ع سيرة المراية، كم مرة شايفه بمراية السيارة عناصر منه عن يبحلقوا بالنسوان وبإجريهن وصدورهن ع الحواجز. لتكون هيدي شغلته؟ تنفيس الكبت وقت خضّ البلد..

– خلص، خلينا ننهي هالمكالمة، بعدين قال بعصبوا وبيجوا يتمرجلوا علينا اذا سمعونا عم نحكي عنهن هيك!

هذا المنشور نشر في Lebanon | لبنان, Syria | سورية, طرابلس | Tripoli. حفظ الرابط الثابت.

2 ردان على حكي نسوان عسكري

  1. يقول m:

    عن دور الجيش — النسوان المعنيات فيا تلاقي جواب عند فواز طرابلسي بكتابو “تاريخ لبنان الحديث”
    صفحة 308 تحت عنوان “الجيش، لأمن النظام أم للدفاع الوطني؟”
    الحديث كان وقتا بالستينات والسبعينات… بين سنة السبعين والأربعة وسبعين صار في إضرابات و”ميني” ثورات كتير عمت المناطق اللبنانية كلا وكانت النسوان جزء من الحركة ولازم يكون جزء من الحديث عن هيدا الدور…………

  2. يقول m:

    آه، بس بعدين منعرف شو صار بالخمس وسـبعين!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s