عالمشاع – طفّار

ننشر فيديو وكلمات أغنية “عالمشاع” لفرقة الراب اللبنانية طفار.

الطفار ينطقون بلهجة بعلبكية تحاكي كل فقير و”معتّر” لبناني. يكتبون بطريقة صادقة ورائعة عن مناطق لبنان المحرومة، عن فساد الشركات والحكومات، عن المدينة وعن زراعة الحشيش. ألبومهم الأول “صحاب الأرض” كان ظاهرة جديدة في وسط الفن المعاصر اللبناني فللمرة الأولى لم يكن فناً مرتكز على مدينة بيروت ونابع من جامعاتها الباهظة الثمن ولم “يطبطب” للمجتمع الذي لطالما اعتبر الفقر آفة اجتماعية. الطفار يتحدون هذا المجتمع ومسلماته وسلطاته. ألمبوهم الجديد يمس بقضايا مهمة كانتفاضة السجون  والمخالفات والهدم التعسفي المرفق بالعنف الذي شهده سكان المشاعات في الآونة الأخيرة.

ننشر هذه الأغنية اليوم فيما أهالي بعلبك يعتصمون في هذه اللحظات احتجاجاً على انقطاع التيار الكهربائي وهم يدعون إلى الاعتصام مساء كل يوم وقطع الطريق حتى تأمين الكهرباء.

الكلمات و الانتاج الموسيقي وفيديو : طفار 2011

طفرت و صرت عم عمر عالمشاع خبر بالموت من عنا علم شاع

جعفر :
عمر بالمشاع هالارض ملك بوك دفعوك حقا بالضرايب بفواتيرن سرقوك مو ملاقي شقة بأجار و لا انك صاحب عقار ما تقلي ناوي تتفرج هوي و عم بيهد الحيط و تنفذ امر الاخوان لتبني دولة لبنان بالمحبة و الايمان و قابضا عنجد. العم يدعيك للتعاون مع الامن سألو هوي مجوه الله عندو ثقة فبه ؟ و اذا بتسألو بطريقك عن مخالفات البحر كيف قدر النظر يعميه ؟ انت المعمر بالدين هوي معمر بالقانون هوي اللي عم يشوي لحمك انت من الريحة محروم كلن صاروا مع البيئة و املاك الدولة العتيقة المسروقة بالاصل . عموا عن الكسارات والسرقة بالوزارات و الحكم بالبطل صاروا كلن مع الدولة و صرت انت العطل معطل تشكيل الحكومة و مصيرك ع غواتارومية

هوي العرف تحرق حالك لتهز ملايين عنا العرف بيحرقوك ليتدفوا عليك

ناصردين :
واجب متل الصلا انك تسرق الحرامي تجيب خبر مخبرين بيتخبوا بالصرامة ببلد بيكافي العميل بحصة بالحكومة ليش السرق الضريبة ما شفناه بغوانتارومية ؟ ليش المعو الربو بالحبس مات خنق ؟ ليش ما منشوف الجاسوس و حبل الشنق ؟ ليش الجيش عحدود حامل ورقة و قلم ببعلبك الهرمل زارع راية و علم ؟ والبارودة السلموها بمرجعيون كلت فيها قتل و العدالة البرت مجرم ناطر منها حكم و اللي جزر بالحرب ناطر منو عفو ؟ العفو ما بيعطوه مجرمين كلن حرامية يخي كلن سراقين دولة شركة قسموها باسم المذهب والدين وين السرق السوكلين سرق من الدين و الضرايب و فواتير التلفون و البنزين ؟ شوفن عالكراسي مطقمين . حتى تعيش بدو يموت 128 كون الجوع مالو رب مالو دين يسرق دم الحكام بالتقنين .حصة من الايتام للارباح عم يعطوها للتعمر المراقص الزراعة بيهدوها و المبادئ بيبيعوها بشكراً قطر اردوغان الخيانة صارت عنا وجهة نظر بلبنان

انو تقاوم يعني تزرع حشيش يعني تكون انت الدولة و هاي العصابة بحبيش

انا من ظلمهم صفيت طافر بعد ما صرت خالي الجيب طافر .. بدي الكل بعدي يقولا طافر خلي الصوت يوصل للسحاب

فيديو | هذا المنشور نشر في Lebanon | لبنان. حفظ الرابط الثابت.

2 ردان على عالمشاع – طفّار

  1. يقول m:

    ما بعرف مين الصادق ومين الكذاب في مسألة اللي صار في محطة كهرباء لبنان – الزهراني. قرأنا انو إدارة المؤسسة استنجدت بالهيئات الامنية والعسكرية للرد على بعض العمال اللي اتخذوا قرار (بسبب تخويفهم من قبل البلديات والناس في بلدات الجنوب؟؟) بتوقيف العمل الكلي في المحطة الجنوبية المذكورة.
    كمقيم بالمنطقة بقول التالي: انو بالجنوب منفهم انو تقطق الكهرياء بفترة البرق والرعد. والحمدلله انو متل هيق طقس ما بطول (على رغم جماليته او رمانسيته للبعض). بلبنان “شعاع الحضارة” ما فيك تتلذ بالفصول الأربعة اللي خلقها الله!
    طيب، لحد هلق ما كان في برق ورعد الاّ أقل من اسبوع، بس الكهرباء استمرت بعد هيك بالانقطاع. ليه؟ صارت كهربة الشركة تجي سيعتين بدل أربعة. يعني ستة ساعات موزعة على الـ 24 الساعة من اليوم! وين راحت الكهرباء؟؟ وليه هيدا الشي ليصير بس من بعد ما تم نقل المحول الى صيدا والى اهل الرفاه الآخرين؟؟ والحكاية ما انتهت على اختفاء الطاقة اللي بتسخنلك مي لتتحمم انت وعيلتك، ليروحو ولادك على المدرسة نظاف، أو تدرس، أو تستخدم الكمبيوتر لتخلص بحثك…. الكهرباء لما تروح المي بتروح معا في الجنوب، يعني: ما بتتحم! بالأساس مش بس ببطل عندك كهرباء لتسخن المي. المي لما بتروح الجنوبي بفرشي اسنانه من قنينة يا جماعة! ما بياكل عشان ما يستخدم الحمام…. وووو
    بعبارة أخرى – الأميركان أخترعوا وسيلة تعذيب اسمها “الإيهام بالغرق”. بلبنان اخترعوا التصويت لمغارة جعيتا، كتروا من بارات راس بيروت وما فوق، اخترعوا كل انواع الدعايات التجارية الموهمة بالسعادة والوطنية، زينوا استديوهات البرامج الحوارية والترفيهية باحدث الديكورات والالوان الزاهية، جذبوا التمويل الدولي لمشاريعهم “الانسانية والتنموية” (رفعو اسعار الشقق لانه الاجنبي المُستورد مع البرامج التنموية بيدفع اكثر)، صار عندهم جمعية أهلية لكل 400 شخص ما بترفه منها حدا غير العاملين فيها بسهرات بعد العمل، … كل هيدا كإختراع لبناني اسمه: “الايهام بالسعادة”.

    ودُمتم على كهربا!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s